काठमाडौं । हेटौंडामा सुनको गरगहना चोरीको आरोपमा प्रहरीले दुई जनालाई पक्राउ गरेको छ ।
पक्राउ पर्नेहरूमा मकवानपुरको हेटौंडा उपमहानगरपालिका–१५ घर भई हेटौँडा ४ भैरवरोडमा डेरा गरी बस्ने २४ वर्षीय मनोज पुलामी मगर र हेटौँडा ७ नागस्वतीस्थित शिवशक्ती सुनचाँदी पसलका सञ्चालक २५ वर्षीय धिरज विश्वकर्मा रहेका छन् ।
मकवानपुर प्रहरी प्रवक्ता डीएसपी श्यामु अर्यालले पुलामिले हेटौँडा ८ कमानेका सन्तोष अधिकारीको घरबाट ७ कार्तिकमा सुनका गरगहना र मोबाइल चोरी गरेको बताए ।
सुन चोरी गर्ने व्यक्तिको खोजी गर्ने क्रममा पक्राउ परेका पुलामिले चोरीका गहना विश्वकर्मालाई बेचेको बयान दिएपछि प्रहरीले उनलाई पनि पक्राउ गरेको हो । पुलामिले अधिकारीको घरबाट ३.५ तोला सुन र ५ तोला चाँदीका झुम्का, मंगलसुत्र, पाउजु लगायतका गहना चोरी गरेको प्रहरीले जनाएको छ ।
पक्राउ परेकाहरूलाई मकवानपुर जिल्ला अदालत हेटौडाबाट ७ दिनको म्याद अनुमति लिई थप अनुसन्धान भइरहेको अर्यालले बताए ।
