नेपाली क्रिकेट टिमका लेग स्पिनर सन्दीप लामिछानेलाई अमेरिकाको भिसा दिलाउनका लागि युवा तथा खेलकुद मन्त्रालयले आवश्यक पहल सुरु गरेको छ । युवा तथा खेलकुदमन्त्री विराजभक्त श्रेष्ठ र नेपाल क्रिकेट संघ क्यानका सचिव पारस खड्कासँगको कुराकानी पश्चात् खेलकुद मन्त्रालयले सन्दीपलाई भिसा उपलब्ध गराउन आवश्यक सहजीकरण गर्न परराष्ट्र मन्त्रालयलाई अनुरोध गर्दै पत्र पठाएको छ ।
मन्त्री श्रेष्ठले सन्दीपको भिसाका लागि खेलकुद मन्त्रालयबाट गर्नुपर्ने सबै पहल गरेको र सबै किसिमको सहयोगलाई जारी राख्ने बताए । अब परराष्ट्र मन्त्रालयले सन्दीपको भिसाको विषयमा काम कारबाही अगाडि बढाउनेछ । बुधबार सन्दीपलाई अन्तर्वार्तामा बोलाएर अमेरिकी दूतावासले भिसा दिन अस्वीकार गरेको थियो । भिसा एप्लाई स्वीकृत नहुँदा सन्दीपले विश्वकप खेल्ने–नखेल्ने अन्योल बढेको छ । आसन्न टी–२० विश्वकप आउँदो २ जुनदेखि अमेरिका र वेस्ट इण्डिजमा आयोजना हुँदैछ ।
