रुकुम पूर्व । जिल्ला प्रहरी कार्यालय रुकुम पूर्वले एक वर्षमा १८५ वटा अवैध हतियार बरामद गरेको छ । गत वर्षको फागुनदेखि यही चैत १२ गतेसम्म कार्यालयले उक्त परिमाणमा अवैध हतियार बरामद गरेको हो । बरामद हतियारमध्ये १८३ भरुवा बन्दुक र दुई थान पेस्ताल रहेको प्रहरीले जनाएको छ । यही हप्तामात्रै भुमे गाउँपालिका–४ र १ स्थित ओढार र रुखमुनि लुकाइराखेको ६ वटा भरुवा बन्दुक फेला परेको छ ।
जिल्ला प्रहरी कार्यालयका सूचना अधिकारी प्रहरी निरीक्षक हरि भट्टराईका अनुसार भुमे गाउँपालिकाकै वडा नम्बर–९ गोठेबाङ बस्ने नवीन मल्ल भनिने विश्वविक्रम मल्लको घरबाट म्यागजिनसहितको एक थान अटोमेटिक पेस्तोल बरामद गरिएको छ । मल्ललाई पनि पक्राउ गरेर अनुसन्धान भइरहेको उनको भनाइ छ ।
गोप्य सूचना र सुराकीका आधारमा हतियार बरामद हुने गरेको जिल्ला प्रहरी कार्यालयकी प्रमुख डीएसपी अञ्जना श्रेष्ठले बताइन् । ‘यति हातियार फेला पर्दा ४ जनामाथि कानुनअनुसार कारबाही प्रक्रिया अघि बढेको छ । कारबाही हुने डरले कतिपयले आफूसाग भएका हतियार अन्कन्टार ठाउामा लगेर राखिदिने गरेको हुनसक्छ,’ उनले भनिन्, ‘यस कारण हामीले हातियारवाला मान्छे पक्राउ गर्न सकिरहेका छैनौं । तर अवैध हतियार भने बरामद गरिरहेका छौं ।’
वन्यजन्तुको सिकारका लागि जंगलमै हतियार राख्ने गरिएको पनि डीएसपी श्रेष्ठको भनाइ छ । त्यस्तै केही ठाउँमा द्वन्द्वकालीन हतियारहरू पनि फेला परिरहेको उनले बताइन् ।
