प्योङयोङ । उत्तर कोरियाका नेता किम जोङ उन एकपटक फेरि चर्चामा छन् । दक्षिण कोरिया र अमेरिकाको संयुक्त अभ्यास समाप्त हुनुअघि उत्तर कोरियाले नयाँ सैन्य प्रदर्शन गरेको छ । बुधवार भएको सैन्य प्रदर्शनको नेतृत्व किमले गरेका थिए । यस क्रममा उनले कमान्डरहरूलाई वास्तविक युद्धजस्तै अभ्यास गर्न आदेश दिएका थिए ।
अभ्यासमा नयाँ खालको मुख्य युद्ध ट्याङ्कको पहिलो प्रदर्शन अभ्यास पनि गरिएको थियो । यो अभ्यासमा किमको साथमा रक्षामन्त्री काङ सुन नाम लगायतका वरिष्ठ अधिकारीहरू पनि उपस्थित थिए । एउटा तस्बिरमा किमले युद्ध ट्याङ्कबाट बाहिर हेरिरहेको देख्न सकिन्छ । खबरहरूका अनुसार किम आफैँले पनि ट्याङ्क चलाएका थिए ।
दक्षिण कोरिया र अमेरिकाले वार्षिक रूपमा गर्दै आएको संयुक्त अभ्यास बिहीबार समाप्त हुँदैछ । यही बेलामा उत्तरले यो अभ्यास गरेको हो । तनाव कम गर्ने उद्देश्यले सन् २०१८ मा दुई कोरियाली देशबिच भएको सैन्य सम्झौता उत्तर कोरियाले नोभेम्बरमा एकतर्फी रूपमा रद्द गरेको थियो । उक्त सम्झौता रद्द भएयताको दक्षिण कोरिया र अमेरिकाबिचको यो पहिलो अभ्यास थियो । यस अभ्यासलाई फ्रिडम शिल्ड एक्सरसाइज नाम दिइएको छ ।
