काठमाडौं । आज डिसेम्बर १ तारिख, विश्व एड्स दिवस । ३६औँ विश्व एड्स दिवस नेपालमा पनि विविध कार्यक्रम गरि मनाईदैछ । ‘समुदायको नेतृत्वमा एड्सको अन्त्य’, भन्ने नारासहित विभिन्न चेतनामुलक कार्यक्रम गरि दिवस मनाउन लागिएको हो । स्वास्थ्य तथा जनसङ्ख्या मन्त्रालयअन्तर्गतको राष्ट्रिय एड्स तथा यौन रोग नियन्त्रण केन्द्रले यससम्बन्धी चेतना र सन्देशमूलक कार्यक्रमको आयोजना गरेको छ ।
सन् १९८१ मा पहिलो एचआईभी सङ्क्रमित फेला परेदेखि सन् २०२२ को अन्त्यसम्ममा ८ करोड ५६ लाख जना संक्रमित भएका छन् । सङ्क्रमणका कारण चार करोड चार लाखको मृत्यु भइसकेको छ ।
विश्वमा हरेक दिन ३ हजार ६ सय मानिस एचआईभी सङ्क्रमित हुने गरेको तथ्यांक छ । केन्द्रका अनुसार नेपालमा सन् २०२२ को अन्त्यसम्म ३० हजार व्यक्तिमा एचआईभी सङ्क्रमण भएको अनुमान छ । नेपालमा हरेक दिन एकजना एचआइभीबाट सङ्क्रमित हुने गरेको छ ।
