राजविराज । सप्तरी प्रहरीले श्रोत नखुलेको झण्डै ८ लाख रुपैयाँसहित दुई जना युवतीलाई पक्राउ गरेको छ । सप्तरीको अग्नीसाईर कृष्णासवरण गाउँपालिका २ की सीमा भनिने सागर कुमारी चौधरी र सिरहाको लहान नगरपालिका १ की २६ वर्षिया चन्दा कुमारी चौधरीलाई श्रोत नखुलेको ७ लाख ८६ हजार ५ सय रुँपैयासहित प्रहरीले पक्राउ गरेको हो ।
अघिल्लो दिन सप्तरीको रुपनी गाउापालिका १ स्थित खाडो खोलाको पुलमा चेकजाचको क्रममा स्कुटीमा सवार उनीहरुको साथबाट श्रोत नखुलेको उक्त रकम बरामद गरिएको जिल्ला प्रहरी कार्यालय सप्तरीका प्रवक्ता डिएसपी ढुण्डिराज नेउपानेले जानकारी दिए ।
पक्राउ परेकाहरु बारे मंगलबार घटना विवरण सार्वजनिम गर्दै डिएसपी नेउपानेले चेकजाचको क्रममा दुबै जना सवार प्र.१–००४८प.३०९० नम्बरको स्कुटीको डिक्कीबाट ७ लाख ५० हजार तथा उनीहरुले लगाएको ज्याकेटबाट ३६ हजार ५ सय रुँपैया बरामद भएको जानकारी दिए । उनले पक्राउ परेकाहरु उपर राष्ट्र बैंक ऐन २०५८ को दफा ९५ बमोजिम कारवाही चलाउने समेत जानकारी दिएका छन् ।
