काठमाडौं । एक क्विन्टल सुन तस्करी प्रकरणपछि अर्थ मन्त्रालयले भन्सार प्रमुख अरुण पोखरेललाई हटाएको छ । उहाँलाई हटाएर सहसचिव टोकराज पाण्डेलाई त्रिभुवन विमानस्थलको भन्सार कार्यालयको प्रमुखको जिम्मेवारी दिएको हो ।
यसअघिका भन्सार प्रमुख अरुण पोखरेललाई हटाएर पाण्डेलाई जिम्मेवारी दिइएको अर्थ मन्त्रालयका प्रवक्ता धनिराम शर्माले जानकारी दिनुभयो । पाण्डे आइतबार मात्रै राष्ट्रिय किताबखानाको महानिर्देशकबाट अर्थ मन्त्रालयमा सरुवा हुनुभएको थियो ।
प्रमुखको जिम्मेवारीमा पोखरेल भएपनि उहाँ बिदामा रहेका बेला सुन तस्करी भएको थियो । उहाँ २ महिनादेखि बिदामा हुनुहुन्थ्यो । पोखरेल बिदामा रहेकै बेला ३ साउनमा विमानस्थल पार गरेर करिब एक क्विन्टल सुन सिनामंगलबाट राजस्व अनुसन्धान विभागले बरामद गरेको थियो ।
प्रकाशित मिति : २०८० साउन ९ गते मङ्गलवार
