बन्दीपुर । बन्दीपुर गाउँपालिकाले बाँदरका कारण पीडित कृषकलाई बाँदर धपाउन ३० तोप निःशुल्क वितरण गरेको छ। गाउँपालिका मातहत रहेका छ वटै वडाका कृषकलाई पहिलो चरणमा बाँदर धपाउने तोप वितरण गरिएको हो।
ठूलो आवाज आउने भएकाले अन्य उपकरणको तुलनामा बाँदर धपाउन यो उपकरण निकै प्रभावकारी रहेको गाउँपालिकाका प्रवक्ता शिवकुमार श्रेष्ठले बताउनुभयो ।
पहिलो चरणमा अत्यधिक मात्रामा बाँदरले दुःख दिएका क्षेत्रका किसानलाई प्राथमिकता दिंदै आएको गाउँपालिकाले जनाएको छ। बाँदरले क्षति नगर्ने किसिमका वैकल्पिक खेतीतर्फ अग्रसर बन्न गाउँपालिकाले हौस्याउँदै आएको उहाँले बताउनुभयो ।
खेतबारीमा लगाइएको अन्नबाली र तरकारी बाली नष्ट गर्न थालेपछि किसानले गाउँपालिकासँग बाँदर धपाउने उपकरण माग गरेको गाउँपालिकाका अध्यक्ष सुरेन्द्र थापाले बताउनुभयो ।
कृषकका मागलाई सम्बोधन गर्न गाउँपालिका कार्यालयले एक लाख रुपैयाँ बजेट विनियोजन गरेको उहाँले बताउनुभयो । कृषि ज्ञान केन्द्रले बाँदरले हैरान दिएका क्षेत्रमा वैकल्पिक खेतीका रूपमा बेसार र अदुवा लगायतका खेती लगाउन कृषकलाई आग्रह गरेको छ।
बाँदरले हैरान बनाएपछि व्यास नगरपालिका–८ र १३ वडामा करिब दुई सय रोपनी क्षेत्रफलमा परीक्षणका रूपमा व्यावसायिक तरीकाले बेसारखेती गर्न थालिएको छ। कार्यालयले दुई वडाका लागि सात लाख रुपैयाँ अनुदान प्रदान गरिसकेको वरिष्ठ कृषि विकास अधिकृत कुलप्रसाद तिवारीले बताउनुभयो । ‘हामीले पैसा दिएका छौं’ कृषकले बीउबिजन र आवश्यक पर्ने औजार खरिद गरेर काम थाल्नुभएको छ ।
