काठमाडौं । लुयान ब्रान्डका एमएनके थ्री मोडेलका दुई नयाँ भेरियन्टका सस्ता बिजुली स्कुटर नेपाली बजार भित्रिएका छन् । लुयानका लागि नेपालको आधिकारिक बिक्रेता जेरो इमिसन नेपालले यी स्कुटर बजारमा भित्र्याएको हो ।
यसअघि एमएनके मोडेलको लिड एसिड ब्याट्री बिक्री गर्दै आएकोमा अब कम्पनीले ग्रफिन र लिथियम आयन ब्याट्री भर्सनका बिजुली स्कुटर बिक्री गर्ने भएको छ । यी सबै भेरियन्टका स्कुटर सुन्तला रङ्ग र रातो रङ्गमा उपलब्ध भएका छन् ।
कम्पनीले लिड एसिड ब्याट्री भर्सनको मूल्य एक लाख ७३ हजार ७०० रुपैयाँ, ग्रफिन ब्याट्री भेरियन्टको मूल्य एक लाख ८२ हजार ७०० रुपैयाँ र लिथियम आयन ब्याट्री भर्सनको मूल्य दुई लाख ४० हजार ३०० रुपैयाँ कायम गरेको छ ।
नयाँ भेरियन्टमा केही विशेष फिचरहरू समावेश भएको कम्पनीले जनाएको छ । विशेषगरी यी स्कुटरमा एनएफसी सेन्सर कार्ड रहेको छ, जसले गर्दा यसमा की इन्ट्री र एन्टी थेप्ट अलार्म एक्टिभेट हुने सिस्टम जडान गरिएको छ ।
त्यस्तै यसमा टर्न सिग्नल लाइट र बजर अलर्ट समेत रहेको छ । यी भेरियन्टका स्कुटरमा १५०० वाट क्षमताका लिक्विड कुल्ड हब मोटर, ७२ भोल्ट ३२ एम्पियरको ब्याट्री र ७२ भोल्ट ५० एम्पियरको कन्ट्रोलर जडान गरिएको छ । कम्पनीका अनुसार यो स्कुटर एक पटकको फुल चार्जमा ५५ देखि ६० को स्पिडमा ७० देखि ८० किमि र ३५ देखि ४५ को स्पिडमा ८० देखि १०० किमि गुडाउन सकिन्छ ।
यसैगरी स्कुटरको अगाडिपट्टिको चक्कामा डिस्क ब्रेक र पछाडिको चक्कामा सेरामिक ड्रम ब्रेक रहेको छ । यसमा भएको अटो ह्विल लक, चाइल्ड लक र यूएसबी पोर्ट जस्ता सुविधाले यस स्कुटरलाई सुरक्षित बनाउने कम्पनीको दाबी छ ।
