१६ भदौ, काठमाडौं । स्पानिस ला लिगामा बार्सिलोनाले रियल भाल्लाडोलिडलाई ७-० को फराकिलो अन्तरले पराजित गरेको छ । जसमा राफिन्हाले ह्याट्रिक गर्दा रोवर्ट लेवान्डोस्की, जुल्स कुन्डे, डानी ओल्मो र फेरान टोरेसले एक/एक गोल गरे ।
घरेलु मैदानमा भएको खेलको २०औं मिनेटमा राफिन्हाले गोल गर्दै बार्सिलोनालाई अग्रता दिलाएका थिए । त्यसको चार मिनेटपछि नै लेवान्डोस्कीले अग्रता दोब्बर पारे । जुल्स कोन्डे पहिलो हाफको इन्जुरी टाइममा गोल गरेपछि बार्सिलोनाले ३-० को अग्रता बनायो ।
६४औं मिनेटमा राफिन्हाले लेवान्डोस्कीको पासमा व्यक्तिगत दोस्रो गोल गरे । ७२औं मिनेटमा राफिन्हाले गोल गर्दै आफ्नो ह्याट्रिक पूरा गरे भने बार्सिलोनाले ५-० को अग्रता बनायो । त्यसपछि ओल्मोले ८२औं र फेरान टोरेसले ८५औं मिनेटमा गोल गरेपछि बार्सिलोनाले फराकिलो अन्तरले जित निकालेको हो ।
नयाँ सिजनमा राम्रो सुरुवात गरेको बार्सिलोनाको यो लगातार चौथो जित हो । चार खेलबाट १२ अंक जोडेको बार्सिलोना शीर्ष स्थानमै आसिन छ । समान खेलबाट एट्लेटिको मड्रिड ८ अंकसहित दोस्रो स्थानमा छ । समान ८ अंक नै रहेको भियारियाल तेस्रो स्थानमा छ ।
