सुर्खेत । माओवादी केन्द्रका अध्यक्ष पुष्पकमल दाहाल ‘प्रचण्ड’ले यो सरकार किन फेरियो भनेर नेपालमा आफूले जति कसैले नबुझेको बताएका छन् । शुक्रबार प्रशिक्षण कार्यक्रममा सहभागी हुन सुर्खेत आएका माओवादी केन्द्रका अध्यक्ष प्रचण्डले सय दिन हनिमुनको दिन भनियतापनि यिनै दिनमा थुप्रै ज्याजती र गलत काम भएको बताए ।
गलत काम भए हामी छोड्दैनौ भन्ने हाम्रो भाषा हो । त्यो विद्रोहको भाषा भनिदैन उनले भने, ‘बेथिति र भ्रष्टाचारीलाई जोगाउनकै लागि सरकार परिवर्तन भएको हो । गलत कार्य गर्नेलाई माओवादी केन्द्रले छोड्दैन । जरुरी परे सडकमा पनि जान्छौं ।’
सरकारबाट बाहिरिएपछि आफू पार्टीलाई मजबुत बनाउन लागि परेको अध्यक्ष प्रचण्डले बताए । साथै, अध्यक्ष प्रचण्डले नेतृत्व हस्तान्तरण उपयुक्त नरहेको बताएका छन् । ‘म झण्डै ७० वर्ष कट्दै छु, सधैँ नेतृत्व गरिरहने रुचि छैन्’ उनले भने, ‘अब त मलाई अध्यक्ष भन्ने पद त्यति ठूलो लाग्दैन । देश दुनियाँमा अध्यक्ष भन्दा प्रचण्ड माथि भइसक्यो । एउटा राम्रो टिम बनेपछि म अर्को भूमिकामा जाने सोचिरहेको छु।’
पार्टी फुट्ने भन्ने चर्चा गलत भएको उनले बताए । उक्त विषय गलत प्रचार गर्न नियोजित रूपमा भ्रम सिर्जना गरेको धारणा व्यक्त गरे । एमाले सांसद्हरुले सदनमै हिंसा शब्द प्रयोग गरेको उपयुक्त नभएको बताए । संविधानमा नै माओवादी जनयुद्ध शब्द प्रयोग गरिएको भएको अध्यक्ष प्रचण्डले जिकिर गरे । अपमानित हुने किसिमले माओवादी केन्द्रलाई ऐतिहासिक भूमिका र महत्त्वलाई नबोल्दा राम्रो हुने जानकारी दिए ।
