काठमाडौं । अर्घाखाँचीको छत्रदेव गाउँपालिका–०७ काउलेका २४ बर्षे कृष्ण पाण्डे यूएईमा मृत फेला पर्नुभएको छ । सोमबार पाण्डेलाई दुवईको सडक छेउमा मृत भेटिएको दुबई प्रहरीले जनाएको छ ।
पाण्डे दुई वर्षअघि भिजिट भिषामा दुबई पुग्नुभएको थियो । उहाँ दुबईस्थित एक होटलमा काम गर्दै आउनुभएको थियो । तर तीन महिनाअघि होटलको काम छोडेर बस्नुभएका उहाँ मृत भेटिनुभयो ।
भिजिट भिसामा जानुभएका कारण उहाँको शव नेपाल ल्याउन अहिले समस्या भएको छ । अर्कोतर्फ परिवारको आर्थिक अवस्था समेत कमजोर भएका कारण शव ल्याउन नसकिएको मृतकका दाई प्रकाश पाण्डेले बताउनुयो । ‘परिवारको आर्थिक अवस्था कमजोर छ । भिजिटमा गएकाको सरकारले उद्धार गर्दैन भन्ने सुनेका छौँ’, प्रकाशले भन्नुुभयो, ‘बाबुको उपचारको चिन्ता अर्कोतर्फ छ । भाई त आएन, कम्तीमा शव भएपनि नेपाल ल्याउन सहयोग गरिदिन सरकारसँग आग्रह गछौँ ।’
दाई प्रकाश पाण्डेका अनुसार बाबुको उपचारका निम्ती उहाँका आमा, बुबा र कृष्णकी श्रीमती र छोरी भारतमा हुनुहुन्छ ।
