१० भदौ, काठमाडौं । प्रिमियर लिगमा लिभरपुलले ब्रेन्टफोर्डलाई २-० ले पराजित गरेको छ । नयाँ सिजन लिगमा लिभरपुलको यो लगातार दोस्रो जित हो । घरेलु मैदान एनफिल्डमा गएराति भएको खेलमा लिभरपुलका लागि लुइस डियाज र मोहमद सालाहले गोल गरे ।
खेलको १३औं मिनेटमा डियाजले डिएगो जोटाको पासमा गोल गर्दै लिभरपुललाई अग्रता दिलाएका थिए । डियाजकै असिस्टमा सालाहले ७०औं मिनेटमा लिभरपुलका लागि दोस्रो गोल गरे ।
नयाँ सिजन लिभरपुलसहित साविक विजेता म्यानचेष्टर सिटी, ब्राइटन र आर्सनलले मात्र शतप्रतिशत खेल जितेका छन् । चारै टोलीको समान ६ अंक छ । तर गोलअन्तरमा सिटी शीर्ष स्थानमा छ । ब्राइटन दोस्रो र आर्सनल तेस्रो स्थानमा रहँदा लिभरपुल चौथो स्थानमा उक्लेको छ ।
प्रकाशित मिति : २०८१ भाद्र १० गते सोमवार
