काठमाडौं । उपप्रधानमन्त्री तथा परराष्ट्रमन्त्री नारायणकाजी श्रेष्ठको सम्पत्ति एउटा गाडि र बैंक खातामा १ लाख २२ हजार ९ सय १८ रुपैयाँ रहेको सार्वजनिक भएको छ । नारायणकाजीसँग कुनै पनि कम्पनीको शेयर वा धितोपत्रहरु नभएको सम्पत्ति विवरणमा खुलाइएको छ ।
श्रेष्ठले गोरखा सिरानचोकमा आफ्नो नाममा रहेको विभिन्न कित्ताका ३९ रोपनीभन्दा बढी जमिन सम्पत्ती विवरणमा खुलाउनु भएको छ । तर, उहाँले ती जमिन २०५८ सालमै पार्टीलाई हस्तान्तरण गर्ने घोषणा गरिसकेको र जग्गा नामसारीको प्रक्रियामै रहेको खुलाउनु भएको छ ।
उहाँसँग भएको बा १० च ५७९८ नम्बरको महिन्द्रा गाडी प्रधानमन्त्री तथा माओवादी केन्द्रका अध्यक्ष पुष्पकमल दाहालले प्रयोगका लागि उपलब्ध गराएको श्रेष्ठले सम्पत्ति विवरणमा उल्लेख गर्नुभएको छ । तर, प्रधानमन्त्री दाहालले आफ्नो सम्पत्ती विवरणमा यस प्रकारको गाडीबारे कुनै खुलासा गर्नु भएको छैन ।
