काठमाडौं, जेठ ८ गते । सहकारी प्रकरणको छानबिन समितिको कार्यादेशका लागि गठित समितिको बैठक आज पनि विनानिष्कर्ष टुंगिएको छ । बैठकबाट बाहिरिँदै कानूनमन्त्री पदम गिरीले विभिन्न विकल्पमा छलफल भइरहेको बताए । उनले आजको बैठक केही आशावादीरूपमा अघि बढेको पनि जानकारी दिए । तर, व्यक्तिको नाम किटान गरेर जाँदा गलत नजिर स्थापित हुने भन्दै त्यसमा सत्ता पक्ष तयार नरहेको मन्त्री गिरीले बताएका छन् ।
‘सहकारीको बचतको अपचलनको विषयलाई प्रभावकारी छानबिन गर्ने । कहाँ कसले अपचलन गरेको छ तिनीहरूलाई कारबाही गर्ने बचतकर्ताको रकम फिर्ताको सुनिश्चित गर्ने गरी छानबिन गरी कारबाही कुन ढंगले लान सकिन्छ भन्ने कुरामा सबै एक मत छौं । अस्तिको भन्दा अलि आशावादीरूपमा छलफल भएको छ’, उनले भने । गृहमन्त्री रवि लामिछाने जोडिएको सूर्यदर्शनलगायतका सहकारीको नाम राख्ने विषयमा आफूहरू तयार रहेपनि पहिले नै दोषी करार गरेर जान नहुने गिरीले बताए ।
‘कोही व्यक्ति दोषी हो होइन भन्ने छानबिनपछि थाहा लाग्छ । पहिले नै कोही दोषी हो भनेर जाँदा यथार्थ बाहिर आउँदैन । अपचलन गरेको छ भने जो कोही पनि कारबाहीको दायरामा आउनुपर्छ’, मन्त्री गिरीले भने, ‘गृहमन्त्रीको नाम जोडिएका सहकारीको नाम लेख्नुपर्नेमा कुनै आपत्ति छैन । रवि लामिछानेले नै अपचलन गर्नुभयो उहाँमाथि छानबिन गर्नुपर्यो भन्ने भाष्य बनाइँदैछ त्यो ठीक होइन भन्ने हो । यो विषयले सदनलाई बन्दक बनाउन नहुने भनेर आफूहरूले कांग्रेसलाई भनेको उनले बताए ।’
