काठमाडौँ, ८ जेठ । महिला, बालबालिका तथा ज्येष्ठ नागरिक मन्त्री भगबती चौधरीले महिला सम्बन्धि कार्यक्रम सञ्चालन गर्दा आर्थिक तथा सामाजिक रूपले पछाडि पारिएका व्यक्तिलाई लक्षित गर्नुपर्ने बताउनुभएको छ ।
महिला, बालबालिका तथा ज्येष्ठ नागरिक मन्त्रालयले विश्व बैंकको सहकार्यमा सुरू गरेको “लैङ्गिक हिंसा रोकथामका लागि एकीकृत विकास परियोजना”को शुभारम्भ गर्दै मन्त्री चौधरीले त्यस्तो बताउनुभएको हो ।
मन्त्रालयले महिला तथा बालबालिका लक्षित कार्यक्रम सञ्चालन गर्दा सीमान्तकृत वर्ग, समुदायका व्यक्तिलाई समेट्नुपर्ने मन्त्री चौधरीले बताउनुभयो । ‘जो थिचोमिचोमा परेका छन्, सीमान्तकृत समुदायका वर्ग तथा समुदायलाई समेट्नुपर्छ । अहिले ६ वटा पालिकामा यो परियोजना सञ्चालन भएको छ । यसलाई अझ बिस्तार गर्न आवश्यक छ’, मन्त्री चौधरीले भन्नुभयो ।
यी क्षेत्रमा कार्यक्रम सञ्चालन गर्दा मध्यपहाडी लोकमार्ग, तराई-पहाड फास्ट ट्रर्याकले छुने पालिकाहरू, सीमाना क्षेत्रका वर्ग, समुदायका उत्पिडित, सीमान्तकृत महिलाहरूलाई कार्यक्रम लक्षित गर्नुपर्ने उहाँले बताउनुभयो ।
परियोजनाले महिलाको सुरक्षा, सुरक्षित आवास, सेल्टर, अस्पतालहरूमा उपचार लगायतको विषय समेटिएको भन्दै उहाँले अझैपनि महिला हिंसाका घटनाहरूमा तत्काल रेश्पोन्स गर्नेखालको कार्यक्रमहरू अझ बढी आउन आवश्यक रहेको बताउनुभयो । ‘महिला हिंसाका घटनाहरूको तत्काल रेस्पोन्स गर्नुस् । हिंसाका घटनाहरू अझैपनि रोकिएनन्, यसमा अझ बढी संवेदनशिल भएर काम गर्नुस्’, उहाँले भन्नुभयो ।
विकास साझेदार संस्थाहरूलाई आग्रह गर्दै मन्त्री चौधरीले चेलिबेटी बेचबिखन तथा ओसारपसार नियन्त्रण जस्ता घटनाहरूमा बढी संवेदनशिल भएर काम गर्न आग्रह गर्नुभयो । मन्त्री चौधरीले भन्नुभयो, ‘यो परियोजना सञ्चालन भएका पालिकाहरूमा पालिका आफैँले लैंगिक हिंसा न्यूनीकरणको कार्यक्रम सञ्चालन गर्न सक्छ । पालिकाहरूलाई म त्यसरी जान आग्रह गर्दछु ।’
विभिन्न प्रलोभनमा पारेर लैंगिक हिंसा हुने गरेको भन्दै उहाँले त्यसलाई न्यूनीकरण हुनेगरी काम गर्न आग्रह गर्नुभयो । ‘अहिलेको अवस्थामा हरेक जसो ठाउँमा हिंसा हुने गरेको तथ्यांक छ । पद दिन्छु । जागिर लगाइदिन्छु विभिन्न प्रलोभनमा पारेर हिंसा हुने गरेको छ’, मन्त्री चौधरीले भन्नुभयो, ‘त्यसको अन्त्य हुनेगरी यो परियोजनाले काम गरोस् ।’
गरिबीको रेखामुनी रहेका व्यक्तिको आर्थिक अवस्था माथि उठाउने काम गर्न आग्रह गर्दै उहाँले परियोजना गएका पालिकाहरूमा महिला हिंसा शून्य पार्नेगरी काम गर्न आग्रह गर्नुभयो ।
