काठमाडौं । आईपीएल २०२४ को ६४ औं खेलमा दिल्ली क्यापिटल्सले लखनउ सुपर जाइन्ट्सलाई रोमाञ्चक खेलमा १९ रनले पराजित गरेको छ । यो जितसँगै दिल्लीको टोली प्लेअफको दौडमा पुगेको छ । यति मात्र हैन, दिल्लीको जितको फाइदा राजस्थान रोयल्सले पाएको छ ।
राजस्थानको टोली आजै प्लेअफमा पुगेको छ । उसको १६ अंक छ । राजस्थान बाहेक अरु दुई टोलीले १६ वा सोभन्दा बढी अंक लिन सक्नेछन् । राजस्थानको अझै एक खेल बाँकी छ । योसँगै चेन्नईको १३ खेलमा १४ अंक छ भने सनराइजर्स हैदरावादको १२ खेलमा १४ अंक छ । यसबाहेक अन्य कुनै पनि टोलीले १४ अंकभन्दा बढी स्कोर गर्न सक्ने छैनन्। यसैले आजैबाट राजस्थानको टोली प्लेअफमा पुगेको हो ।
लखनउको टोली अझै प्राविधिक रूपमा आईपीएलमा छ। यद्यपि, उसको एक खेल बाँकी छ । टोलीको अधिकतम १४ अंक मात्र पुग्न सक्छ। उसको १३ खेलमा १४ अंक छ । दिल्लीले भने लिग चरणबाटै आफ्नो लक्ष्य पूरा गरेको छ । उसले १४ खेलबाट सात जित र सात हारसहित १४ अंकसहित आफ्नो यात्रा अघि बढाएको छ । रोयल च्यालेन्जर्स बैंग्लोर १२ अंकसहित प्लेअफको दौडमा छ । उसले मे १८ मा चेन्नई सुपर किंग्ससँग खेल्ने छ । यो खेल जित्ने टोलीले प्लेअफमा स्थान पक्का गर्न सक्छ, किनभने दुवैको नेट रन रेट सकारात्मक छ । जबकि दिल्ली र लखनउको नेट रन रेट नकारात्मक छ।
आजको खेलको कुरा गर्दा पहिले ब्याटिङ गरेको दिल्लीले २० ओभरमा चार विकेट गुमाएर २०८ रन बनाएको थियो । अभिषेक पोरेलले ३३ बलमा ५८ रन र ट्रिस्टन स्टब्सले २५ बलमा ५७ रनको अविजित इनिङ खेले । जवाफमा लखनउको टोलीले २० ओभरमा नौ विकेट गुमाएर १८९ रन मात्रै बनाउन सकेको थियो । निकोलस पुरनले २७ बलमा ६१ रनको इनिङ खेले । यस्तै अर्शद खानले ३३ बलमा ५८ रन बनाएर अविजित रहे । दिल्लीका लागि इशान्त शर्माले ३ विकेट लिए ।
