काठमाडौं । गुरुग्रामको एक होटलमा खेलिएको रगतको खेलमा ठूलो खुलासा भएको छ । दिव्या पाहुजा हत्याकाण्डका मुख्य आरोपी अभिजित सिंहलाई प्रहरीले पक्राउ गरेपछि प्रहरी नै चकित हुने खुलासा भएको हो । प्रहरीको सोधपुछका क्रममा अभिजीत सिंहले दिव्याको हत्यामा ठूलो खुलासा गरेका छन् । पेशाले मोडल तथा ग्याङ्स्टर सन्दीप गडोलीकी प्रेमिका दिव्या पाहुजाको हत्या भएको भोलिपल्टै प्रहरीले मुख्य आरोपी र गुरुग्रामस्थित होटल सिटी प्वाइन्टका मालिक अभिजित सिंहलाई पक्राउ गरेको थियो । अभिजीतले प्रहरीसमक्ष यो हत्याको ठूलो खुलासा गर्दै दिव्याले लामो समयदेखि ब्ल्याकमेल गर्दै दिनहुँ पैसा लिने गरेको खुलाएका छन् ।
आरोपी अभिजितका अनुसार दिव्या जनवरी २ मा होटल सिटी प्वाइन्ट पुगेकी थिइन् । अभिजीतले दिव्यालाई आफ्ना अश्लील फोटोहरू डिलिट गर्न भनेका थिए। तर दिव्याले आफ्नो मोबाइलको पासवर्ड दिइनन् । जसका कारण अभिजीत रिसाए र उनले दिव्यालाई गोली हाने ।
हत्यापछि अभिजितले होटलका कर्मचारी हेमराज र ओमप्रकाशलाई शव फाल्न आग्रह गर्दै आफ्नो कार दिएका थिए । जसको तस्बिर त्यहाँ जडान गरिएका सिसिटिभी क्यामेरामा कैद भएको थियो । तर हाल दुई कर्मचारीले दिव्याको शव कहाँ लगे भन्ने थाहा हुन सकेको छैन । अहिले प्रहरी दिव्याको शव खोज्नमा जुटेको छ ।
२७ वर्षीया दिव्या पाहुजा गुरुग्रामको बलदेव नगर निवासी थिइन् । हत्यारा अभिजित उनका साथी थिए । अभिजित साउथ एक्स, दिल्लीका बासिन्दा हुन्। स्रोतका अनुसार अभियुक्तहरूले शवलाई पञ्जाब लगेर गएका छन् । शव बरामद गर्न प्रहरी टोली पनि खटिएको छ ।
