जनकपुरधाम । धनुषाको क्षिरेश्वरनाथ नगरपालिका-३ स्थित सडक छेउमा मृत श्रीमानसँगै घाइते अवस्थामा भेटिएकी अस्मिता शर्माको पनि उपचारको क्रममा मृत्यु भएको छ । हिजो बिहान २५ वर्षीय राधे सहनी मृत फेला परेका थिए भने । उनकी पत्नी अन्दाजी २० वर्षीया अस्मिता घाइते अवस्थामा थिइन् । प्रादेशिक अस्पताल जनकपुरधाममा उपचाररत् अस्मिताको गएराति मृत्यु भएको प्रहरीले बताएको छ ।
मृतक सहनी महोत्तरीको लोहारपट्टी नगरपालिका-३ महदैयाका हुन् । तीन महिनाअगाडि मात्रै राधेले पकडियाकी अस्मितासँग प्रेम विवाह गरेका थिए । प्रहरीका अनुसार राधे विवाहपछि श्रीमतीसँगै धनुषाको महेन्द्रनगरमा डेरा लिएर बस्दै आएका थिए । आइतबार ससुरालीबाट श्रीमतीलाई लिएर महेन्द्रनगरका लागि हिँडेका उनी सोमबार बिहान मृत भेटिए ।
घटनास्थलमा मोटरसाइकलका टुक्राहरू भेटिएको थियो । घटनास्थल हेर्दा उनी दुर्घटनामा परेको हुनसक्ने प्रहरीको अनुमान छ । तर, दुर्घटना भएको मोटरसाइकल घटनास्थलमा नभेटेपछि घटना शंकास्पद मानिएको छ । श्रीमती अस्मिता बोल्न नसक्ने अवस्थामा भएकाले प्रहरीले घटना विवरण सोधपुछ गर्न सकेन । उनको पनि मृत्यु भएकाले अनुसन्धान असहज हुने देखिएको छ ।
धनुषाका प्रहरी प्रवक्ता डीएसपी रञ्जन अवाले दुर्घटनामै राधेको मृत्यु भएको र घाइते उनकी श्रीमतीको पनि उपचारको क्रममा मृत्यू भएको प्रारम्भिक अनुसन्धानबाट देखिएको बताए । उनले भने, ‘घटनास्थलमा मोटरसाइकल फेला नपरेपछि घटना शंकास्पद छ । तर, मोटरसाइकल भेटिसकेको छ । अर्काकै मोटरसाइकल थियो । ती व्यक्तिले मोटरसाइकल लगेका थिए । अहिले नियन्त्रणमा लिएर अनुसन्धान गरिरहेका छौं । राधेसँगै अर्को मोटरसाइकलमा आइरहेका दुई युवक र दुर्घटना भएको मोटरसाइकलका धनीलाई नियन्त्रणमा लिएको डीएसपी अवाले बताए ।’
