काठमाडौं । भारतले नेपाललाई ट्वान्टी–२० विश्वकप क्रिकेट प्रतियोगिताको तयारीको लागि सहयोग गर्ने भएको छ । नेपाल भ्रमणमा रहनुभएका भारतीय विदेशमन्त्री एस. जयशंकरले यस्तो बताउनुभएको हो । नेपाली टोलीलाई विश्वकपमा छनोट भएकोमा बधाई दिँदै उहाँले सहयोग गर्ने प्रतिबद्धता जनाउनुभएको हो । नेपाल भ्रमणका क्रममा जयशंकरले बिहीबार साँझ नेपाल क्रिकेट संघका अध्यक्ष चतुरबहादुर चन्द, सचिव पारस खड्कासहितका पदाधिकारी र खेलाडीहरूसँग भेट गर्नुभएको थियो । जयशंकरले ट्विट गर्दै नेपालमा क्रिकेटको विकासको लागि पनि सहयोग गर्ने उल्लेख गर्नुभयो । नेपाल यसै वर्ष अमेरिका र वेस्ट इन्डिजमा हुने विश्वकपका लागि छनोट भएको छ ।
नेपाली क्रिकेट टोलीका सदस्यहरू र @CricketNep सँग अन्तरक्रिया गर्न पाउँदा खुशी लाग्यो।
टी-२० विश्वकपमा छनोट भएकोमा वहाँहरुलाई हार्दिक बधाई दिदै वहाँहरुको विश्वकप तयारीका लागि भारतको सहयोग रहने विश्वास दिलाएँ । नेपालमा क्रिकेटको विकास लागि भारतको सदैव साथ रहने प्रतिवद्धता जनाएँ । https://t.co/ZsdLl2VP5m
— Dr. S. Jaishankar (Modi Ka Parivar) (@DrSJaishankar) January 4, 2024
