खोटाङ, १५ पुस । सिक्किममा पक्राउ परेकी नेपाली भ्लगर उमा चाम्लिङ राईलाई सिक्किम प्रहरीले स्वदेश फर्काएको छ । सिक्किममा भिडियो पोष्टमार्फत साम्प्रदायिक अशान्ती भड्काउने प्रयास गरेको आरोपमा पक्राउ परेकी खोटाङकी भ्लगर राईलाई सिक्किम प्रहरीले पुस १५ गते नेपाल पठाएको इन्डिय टुडेले जनाएको छ ।
भ्लगर राईलाई सत्तारुढ सिक्किम क्रान्तीकारी मोर्चाको सदस्य सिला राईले दायर गरेको एफआइआरको आधारमा सदर प्रहरीले एडिसन एसपी गान्तोकसँगको सहकार्यमा पुस १४ गते नियन्त्रणमा लिएको थियो । राईलाई अदालतमा पेश गरेर ५ दिनको प्रहरी हिरासतमा राख्ने भनिए पनि ‘परिस्थिति र सुरक्षा चिन्ता’लाई ध्यानमा राखेर नेपाल फर्काउने निर्णय गरिएको समाचारमा उल्लेख छ ।
द सिक्किम क्रोनिकलले प्रारम्भिक अनुसन्धान र बरामदको प्रकृया पुरा भएपछि राईलाई नेपाल फिर्ता पठाइएको जनाएकोछ । भ्लगर राईले पुस १२ गते एउटा भिडियो पोष्ट गर्दै सिक्किमको लेगसेपमा पुस १४ गते साकेला मनाउनका लागि उपस्थित हुन निमन्त्रणा गरेकी थिईन् । यस्तै, पुस १० गते सिक्किमका मुख्यमन्त्री पवन चाम्लिङसँग खिचाएको तस्बीर पोष्ट गरेकी थिईन् । सोही आधारमा उनलाई पक्राउ परेकी हुन् । सिक्किममा आगामी सन् २०२४ मा विधानसभा चुनाव हुँदैछ ।
सिक्किमको सत्तारोहणका लागि वर्तमान मुख्यमन्त्री एवं सिक्किम क्रान्तीकारी चोर्चाका पिएस गोले र पुर्व मुख्यमन्त्री एवं सिक्किम डेमोक्रेटिकफन्टका चाम्लिङ आमनेसामने हुँदैछन् । सिक्किम पुगेर त्यही विधानसभा चुनावका लागि पुर्वमुख्यमन्त्री चाम्लिङको पक्षमा मतदाता प्रभावित पार्न खोजेको आरोपमा भ्लगर राईलाई पक्राउ गरिएको हो । घुमफिरका क्रममा सिक्किम पुगेकी उनी केवल गोले र चाम्लिङ पक्षको चेपुवामा परेकी हुन् ।
उनको गिरफ्तारीपछि सिक्किमका विभिन्न राजनीतिक संगठनले विरोध गरेका थिए । यस्तै, नेपालका किरात राई समुदायले पनि निर्दोषलाई पक्राउ गरिएको भन्दै बिरोध जनाएका थिए ।
