काठमाडौं । सलमान खानका भाइ तथा अभिनेता निर्देशक अरबाज खान अब आफ्नी नयाँ प्रेमिका शौरा खानसँग विवाह गर्न लागेको खबर सार्वजनिक भएको छ । अरबाज लामो समयदेखि आफ्नो व्यक्तिगत जीवनलाई लिएर चर्चामा छन् । करिब एक वर्षअघि अरबाजको प्रेमिका जर्जिया एन्ड्रियानीसँग ब्रेकअप भएको थियो । त्यसअघि उनी उनले मलाइका अरोरासँग सन् २०१७ मा डिभोर्स गरेका थिए । अरबाज र मलाइकाले सन् १९९८ मा विवाह गरेका थिए । अब अरबाज खानको जीवनमा नयाँ युवती आएकी छिन्, जोसँग उनी विवाह गर्न लागेका छन् ।
ती युवतीको नाम शौरा खान हो । अरबाज खान र शौरा खानको विवाहको मिति पनि सार्वजनिक भएको छ । इण्डिया टुडेको रिपोर्ट अनुसार अरबाज खानले २४ डिसेम्बरमा शौरा खानसँग विवाह गर्दैछन् । यो विवाहमा परिवारका सदस्य र नजिकका साथीहरू मात्र सहभागी हुनेछन् । समाचार अनुसार यो विवाह मुम्बईमा हुनेछ । अरबाज र शौरा खानको पहिलो भेट फिल्म ‘पटना शुक्ला’ को सेटमा भएको थियो । शौरा खान पेशाले मेकअप आर्टिस्ट हुन् । उनी लामो समयदेखि बलिउडमा सक्रिय छिन् । उनले रविना टण्डन र उनकी छोरी राशासँग पनि काम गरेकी छिन् ।
