काठमाडौँ । सत्तारुढ नेपाली कांग्रेसले केन्द्रीय कार्यसम्पादन समितिको बैठक बोलाएको छ । सभापति शेरबहादुर देउवाले राष्ट्रिय सभा सदस्य निर्वाचनको तयारी लगायत समसामयिक राजनीतिक विषयहरुमा छलफल गर्न बैठक डाक्नुभएको हो । सानेपास्थित कांग्रेस मुख्यालयमा आज दिउँसो बैठक बस्न लागेको हो । बैठकमा जाजरकोट भूकम्प र पार्टीको महासमिति बैठकको तयारीका विषयमा समेत छलफल गर्ने गरी एजेन्डा तय गरिएको छ ।
त्यस्तै, समसामयिक राजनीतिक विषयहरुमा समेत छलफल हुनेछ । राष्ट्रिय सभा सदस्यको निर्वाचन आगामी माघ ११ गते हुँदैछ । कांग्रेसले पुस १६ देखि १९ गतेसम्म महासमिति बैठक बोलाएको छ । यसअघि संस्थापनइतर पक्षको बैठकले राष्ट्रिय सभा निर्वाचनमा अवसर नपाएकालाई दिनुपर्ने बताएका थिए । देउवाले एउटा गुटको नभई सिंगो पार्टीको नेतृत्व गर्दै सबैलाई समान अवसर प्रदान गर्नुपर्ने शेखर कोइराला र गगन थापाको भनाई छ ।
