ओखलढुंगा । गाम्नाङ गाविसका पूर्व अध्यक्ष तथा ओखलढुंगा जिल्लाका जेष्ठ कम्युनिस्ट नेता षणकृष्ण भट्टराईको ८६ वर्षको उमेरमा मंगलवार साँझ निधन भएको छ । नेकपा एमालेका बयोबृद्ध नेता भट्टराई २०४९ र २०५४ सालमा दुईपटक साबिक गाम्नाङ गाविस हाल लिखु गाउँपालिका (वडा नम्बर ६ र ७) को अध्यक्ष निर्वाचित भएका थिए ।
पछिल्लो समय वीर अस्पतालमा उपचारपछि घर फर्किएका भट्टराईको मंगलवार गाम्नाङटारमै निधन भएको लिखु गाउँपालिका उपाध्यक्ष अस्मिता थापाले विज्ञप्तिमार्फत जनाएकी छन् । भट्टराईको निधनबाट ओखलढुंगाले पहिलो पुस्ताका वामपन्थी नेता गुमाएको एमाले केन्द्रीय सदस्य तथा पूर्व सांसद यज्ञराज सुनुवारले बताएका छन् । भट्टराईका पिता राणाकालीन समयमा डिठ्ठा थिए ।
प्रकाशित मिति : २०८० कार्तिक १५ गते बुधवार
