काठमाडौं । त्रिदेशीय टी–२० क्रिकेट शृंखलाअन्तर्गत यूएईविरुद्धको खेलमा नेपालले चमत्कारीक बलिङ गरेको छ । टस जितेर पहिले फिल्डिङ रोजेको नेपालले सुरुको दुई ओभरमा नै दुई विकेट लिएको छ । नेपालका घातक बलर सोमपाल कामीले पहिलो र तेस्रो ओभरमा नै यूएईका दुई विकेट लिएका छन् ।
उनले पहिलो ओभरमा यूएईका ओपनर खालिद साहको विकेट लिए । यूएईका खालिद साह अत्यन्तै विस्फोटक ब्याट्सम्यान थिए । ५ बल खेल्दा लगातार तीन चौका हानेका खालिदलाई पाँचौं बलमा सोमपालले घर पठाइदिए ।
२.४ ओभरमा नै सोमपाल कामीकै बलमा गुल्सन झाले क्याच गर्दै यूएईको अर्को विकेट लिए । सोमपालले गुल्सनको हातबाट यूएईका कप्तान मुहम्मद वसीमलाई घर पठाए ।
नेपाली टीमका कप्तान रोहित पौडेलले टस जितेर पहिले फिल्डिङको निर्णय गरेका हुन् । यसअघिका ३ वटै खेल जितेको नेपाल फाइनलमा पुगिसकेको छ । यूएईले भने एक खेलमा जीत र एक खेलमा हार व्यहोरेको छ ।
हङकङले भने एक खेल पनि जित्न सकेको छैन । टी–२० विश्वकप छनोटको तयारी स्वरूप नेपालले घरेलु मैदानमा शृंखला खेलिरहेको हो । विश्वकप छनोट एक सातापछि काठमाडौंमै सुरू हुँदैछ ।
