४ कात्तिक, काठमाडौं । मलेसियामा जारी एसीसी यू–१९ प्रिमियर कपको सेमिफाइनलमा नेपालले जापानविरुद्ध पहिले ब्याटिङ गरिरहेको थियो । तर २५ ओभरमा आएपछि मलेसियाको बायुमास ओभलमा भारी बर्षा भएको छ । बर्षाका कारण खेल रोकिएको छ । पीचमा ग्राउण्ड स्टाफले पालले ढाकेका छन् ।
जापानले टस जितेर फिल्डिङ रोज्दै नेपाललाई ब्याटिङको निम्तो दिएको थियो । नेपालले उत्कृष्ट सुरुवात गरिरहेको थियो । नेपालले २५ ओभरको समाप्तिमा २ विकेट क्षति ब्यहोर्दै १४० रन जोडेको छ । क्रिजमा आकाश त्रिपाठी र कप्तान देव खानल छन् । नेपालले ७.६ ओभरमा अर्जुन कुमाल गुमायो ।
२२.१ ओभरमा दिपक बोहोरा आउट भए । अर्जुन कुमाल २३ बलमा मात्र १० रन जोडेर आउट भएका थिए । दिपक बोहोराले ७० बलमा ७९ रन बनाए । १० चौका र २ छक्का सहित उत्कृष्ट ब्याटिङ गरिरहेका दिपक शतक बनाउँन चुके ।
नेपाल समूह ए को विजेता बन्दै सेमिफाइनल पुगेको हो भने जापान समूह डी को विजेता बन्दै अन्तिम चारमा पुगेको हो । नेपाल सेमिफाइनल जित्दै यू–१९ एसिया कपमा छनोट हुने लक्ष्यमा छ । यू–१९ प्रिमियर कपको शीर्ष तीन टोली यू–१९ एसिया कपमा छनोट हुनेछ । सेमिफाइनल भएकाले आज बर्षाले खेल स्थगित भएपनि दोस्रो दिन सोही स्कोरबाट सुरु हुनेछ । भोलिपनि स्थगित भए डिएलएस मेथडबाट निर्णय हुनेछ । नेपालको उत्कृष्ट प्रर्दशन नै रहेकाले जित हासिल गर्ने अपेक्षा गरिन्छ ।
अर्को सेमिफाइनलमा यूएई र सिंगापुर भिड्नेछन् । दुवै सेमिफाइनलका विजेता फाइनल पुग्दै यू–१९ एसिया कपमा छनोट हुनेछन् । यस्तै सेमिफाइनलमा पराजित हुने टिमका लागि पनि यू–१९ एसिया कप पुग्ने अवसर हुनेछ । सेमिफाइनलमा पराजित टोलीबीच तेस्रो स्थानको लागि खेल हुनेछ र उक्त खेलमा विजयी हुने टिम पनि यू–१९ एसिया कपमा पुग्नेछ । नेपालका कप्तान देव खनालले पहिले ब्याटिङ गर्दा २८० देखि ३०० रन बनाउन प्रयास गर्ने र त्यसलाई रक्षा गर्ने लक्ष्य रहेको बताए ।
